HABANG papalapit ang makasaysayang impeachment trial sa susunod na linggo laban kay Vice President Sara Duterte sa Senado, may naglabasan na namang mga panibagong mga rebelasyon sa Kamara.

Ibinunyag ni Deputy Majority Leader Paolo Ortega V ng La Union ang panibagong mga bogus at kahina-hinalang pangalan na nakalista na benipesaryo sa confidential funds ng Office of the Vice President (OVP) kabilang na ang apelyido na kahalintulad sa mga nakaupong Senador, mambabatas at sikat na bakeshop brand.

“These irregularities are too glaring to ignore — these names from supposed ‘Budol Gang’ call for a deeper look,” ani Ortega.

Ayon sa mambabatas, nasilip nila ang pangalan ng ilang indibidwal na may apelyido na kapareho ng mga senador tulad ng “Beth Revilla,” “Janice Marie Revilla,” “Diane Maple Lapid,” “John A”Clarisse Hontiveros,” “Kristine Applegate Estrada,” at “Denise Tanya Escudero” ay umano’y beneficiaries ng confidential funds.

Bukod sa “Mary Grace Piattos,” sinabi ni Ortega na may nakasaad ding “Cannor Adrian Contis,” at mga indibidwal na may apelyidong “Solon” tulad ng Kris Solon at Paul M. Solon, na kapareho sa apelyido ni Sarangani Rep. Steve Chiongbian Solon.

“Hindi lang pala si Mary Grace Piattos ang may kapangalan na café-restaurant, pati pala Contis. Kapag ba may confidential funds ang opisina mo, may sweet tooth ka din? Tapos may ‘Solon’ pa na ka-apelyido ng ating kasamahan na si congressman Steve Solon,” dagdag ni Ortega.

Sinabi pa ni Ortega na hanggang senado ay hindi rin pinalampas ng Budol Gang dala na rin sa pagkakadamay sa pangalan ng isang senador.

“Hindi nakakatawa ang paulit-ulit na paggamit ng mga pekeng pangalan na parang hinugot mula sa sine at showbiz,” pahayag ni Ortega.

Tulad sa mga lumitaw na mga pangalan, wala rin sa talaan ng birth, marriage, o death records ng Philippine Statistics Authority (PSA) sa ang pangalan ng mga nabanggit. (Vina de Guzman)

INIHAYAG ni Speaker Ferdinand Martin Romualdez ang pagkaka-apruba ng 27 sa 28 panukalang batas sa ilalim ng Common Legislative Agenda (CLA) sa isinagawang 8th meeting ng Legislative-Executive Development Advisory Council (LEDAC).

“As of today (Thursday), we have acted on 27 out of the 28 LEDAC priority bills—a near-100% accomplishment rate,” ulat ni Speaker Romualdez kay Presidente Bongbong Marcos.

Dumalo rin sa Ledac meeting sina Senate President Francis “Chiz” Escudero, miyembro ng gabinete at pangunahing lider ng Kongreso sa pangunguna ni House Majority Leader Manuel Jose Dalipe.

“This milestone reflects the House’s unwavering commitment to President Marcos’ call for legislative action that makes a difference in the lives of ordinary Filipinos. These are not just bills—they are real solutions to real problems,” ani Speaker Romualdez.

Sa status report, ipinapakita na sa 12 bills na nilagdaan ni Presidente Marcos ay mula sa 27 LEDAC na panukala. Kabilang na dito ang New Government Procurement Reform Act, Anti-Financial Account Scamming Act, Anti-Agricultural Economic Sabotage Act, VAT on Digital Transactions, Academic Recovery and Accessible Learning Program Act, Self-Reliant Defense Posture Revitalization Act, Philippine Maritime Zones Act, Philippine Archipelagic Sea Lanes Act, CREATE More, Enterprise-Based Education and Training Framework Act, at amendments sa Agricultural Tariffication Act.

Ang panukalang mag-aamyenda sa EPIRA ay naging batas noong Abril 18 habang ang panukalang Capital Markets Promotion Act ay ipinadala nasa Office of the President noong Abril 29.

Sa 28 LEDAC bills, tanging ang panukalang amendments sa Agrarian Reform Law ang nananatiling nakabinbin sa Kamara. (Vina de Guzman)

DINISKWALIPIKA ng Commission on Elections (Comelec) si re-elected Porac, Pampanga Mayor Jaime Capil dahil sa pagkakatanggal sa kanya ng Office of the Ombudsman.

Sa walong pahinang resolusyon, kinatigan ng Comelec Second Division ang petisyon na inihain ni dating mayor Michael Tapang laban kay Capil noong Abril 15.

“Wherefore, premises considered, the Commission (Second Division) resolves to grant the instant Petition, and declare Respondent disqualified from running for the position of Mayor in the Municipality of Porac, Province of Pampanga, in the May 12, 2025 National and Local Elections,” sabi sa desisyon na inilabas noong Miyerkules.

Nadiskuwalipika si Capil sa pagtakbo noong nakaraang halalan matapos ipag-utos ng Ombudsman na tanggalin siya sa serbisyo dahil sa matinding pagpapabaya sa tungkulin sa mga iligal na aktibidad ng Philippine offshore gaming operator (POGO) hub na Lucky South 99 sa munisipyo.

Si Capil ay idineklara bilang alkalde ng bayan ng Porac noong May 12 elections dahil sa pagkakamit ng 39,939 boto, na tinalo si Tapang, na nakakuha lamang ng 23,063 boto.

Gayundin, ipinasiya ng Comelec Second Division na ideklarang “stray” ang mga boto na nakuha ni Capil.

Kasabay nito, iniutos ng Komisyon ang muling pagpupulong ng Municipal Board of Canvassers (MBOC) ng Porac, upang gawin ang mga kinakailangang pagwawasto sa Certificate of Canvass of Votes, at iproklama ang kandidatong may pinakamataas na bilang ng mga balidong boto. (Gene Adsuara)

SA pamamagitan ng City Tourism and Cultural Affairs Office (CTCAO), nag-host ang Pamahalaang Lungsod ng Malabon, pangunguna ni Mayor Jeannie Sandoval ng culinary at cultural showcase para sa mga delegado mula sa Department of Tourism (DOT) kung saan tampok ang food crawl ng iba’t ibang mga masasarap at paboritong pagkain ng lungsod.

Ang aktibidad ay bahagi ng bagong inilunsad na programa ng DOT, “Salo-Salo: Taste the Flavor, Experience the Culture,” na nagdiriwang sa magkakaibang culinary heritage ng bansa at binibigyang-diin nito ang cultural value ng turismo sa merkado bilang isang dynamic tool para sa pangangalaga at promosyon ng pamana.

Dumalo sa okasyon sina DOT Secretary Christina Garcia-Frasco, Undersecretaries Berna Buensuceso, Christine Joy Cari, Maria Rica Bueno, Myra Abubakar, Assistant Secretaries Ronald Conopio, Czarina Zara Loyola, Judilyn Quiatchon, at Sharlene Zabala-Batin.

“Pinagmamalaki po natin ang mga pagkaing sariling atin na sumasalamin sa pamana at tradisyon ng Malabon. Ang mga ito ang nagbibigay sa atin ng pagkakakilanlan bilang mga Malabueno—kaya’t ating tangkilikin, gaya ng Pancit Malabon,” pagbabahagi ni Mayor Jeannie.

Bilang bahagi ng food crawl na inorganisa ng CTCAO, binisita ng mga delegado ang limang iconic food stops: Hazel’s Puto, Jay’R’s Okoy, Original Dolor’s Kakanin, Nanay’s Pancit Malabon, at Ellet’s Sweet (Halo-Halo).

Nagtatampok ang bawat site ng mga live demonstrasyon ng local delicacies at masayang tinikman ng mga bisita ang mga pagkain, kabilang ang Pancit Malabon, okoy, puto at puto pao, halo-halo, at iba’t ibang kakanin (rice cakes).

Bumisita din sila sa Concepcion Market para makita at subukan ang iba’t ibang produktong pagkain na makikita sa lugar.

Binisita din ng grupo ang Guinness World Record Exhibition and Tourist Center na matatagpuan sa City Hall matapos masungkit ng Malabon nitong Mayo ang bagong Guinness World Record “longest line of noodle bowls,” na may 6,549 bowls ng iconic nitong Pancit Malabon.

Sa araw na ito, hindi lang natin ipinakita ang mga masasarap at paborito nating mga pagkain dito sa Malabon, kundi ay ipinakita rin natin ang ating makulay na kultura na bahagi ng ating pagiging isang Malabueno at bilang isang Pilipino. Makakaasa po kayo na mas palalakasin pa ng pamahalaang lungsod ang kultura at turismo ng Malabon,” ani Mayor Sandoval. (Richard Mesa)