KASABAY ng pagdiriwang ng ika-37 na anibersaryo ng Office of the Ombudsman ay nagsagawa ang National Housing Authority (NHA) ng isang ceremonial signing ng Deed of Absolute Sale at issuance of Transfer Certificate of Title nitong Biyernes, Mayo 16, 2025.

Ang nasabing aktibidad ay ang pormal na pagtransfer ng 5,772 square meter lot na matatagpuan sa North Triangle, Diliman, Quezon City mula sa NHA patungo sa Office of the Ombudsman. Ang lote ay nagsisilbing annex ng Office of the Ombudsman Main Building na nagsisilbing extension ng frontline services ng huli.

Sinimulan ni NHA General Manager Joeben A. Tai ang kanyang mensahe sa isang pagbati para sa pagdiriwang ng anniversary ng Ombudsman. Binigyang-pugay niya rin ang kahanga-hanga at hindi matatawarang serbisyo nito para sa publiko.

“At NHA, we are grateful and honored to be part of the expansion of your office here in Quezon City. It is our sincere hope that this advancement will significantly contribute to the improved working condition, overall well-being, and welfare of dedicated civil servants of your institution. Kami ay tunay na nagpapasalamat na maging bahagi ng expansion ninyo ng inyong tanggapan dito sa Quezon City. Taos-puso kaming umaasa na ang inisyatibang ito ay makatutulong nang malaki sa pagpapabuti ng kalagayan sa pagtatrabaho, pangkalahatang kagalingan, at kapakanan ng mga dedikadong civil servants ng inyong institusyon,” pagbabahagi rin ni GM Tai.

Kasama niya sa panig ng Ahensya si NHA NCR-East Sector at Quezon City District Office (QCDO) Officer-in-Charge Ar. Monn Alexander Ong.

Para naman kay Ombudsman Atty. Samuel R. Martires, ang property transfer na ito ay isang “milestone” na maaaring makapag-ambag sa pangmatagalang pangako ng ahensya na itaguyod ang transparency at accountability para sa kapakanan ng bawat Pilipino.

Nakasama naman ni Atty. Martires para sa Office of the Ombudsman sina Deputy Ombudsman Jose M. Balmeo Jr., Assistant Ombudsmen Caesar D. Asuncion, Asryman T. Rafanan, Janet Leah M. Ramos, Finance and Management Information Office (FMIO) Officer-in-Charge Adorie T. Cornito, at Central Administrative Service (CAS) Director Violeta L. Agustin. (PAUL JOHN REYES)

HINDI  maaaring arestuhin ng interpol si dating Presidential spokesperson Atty.Harry Roque na nanatili ngayon sa The Netherlands , ayon sa Department of Justice (DOJ).

Si Roque ay lumipad sa naturang bansa matapos siyang maisyuhan ng warrant of arrest ng Angeles, Pampanga Regional Trial Court, branch 118 para sa kasong qualified human trafficking, dahil sa operasyon ng POGO o scam hub sa Porac, Pampanga.

Paliwanag ni DoJ Chief State Counsel, Dennis Arvin Chan, hindi maaaring arestuhin duon si Atty.Roque habang may nakabinbin itong Petition for Asylum o hanggang hindi pa iyon naresolba.

Kung patuloy naman na magtatago si Roque, sinabi ni Justice Assistant Secretary Mico Clavano na ilalagay muna ng hukuman sa archive ang warrant pero buhay pa rin ang kaso

At kung hindi magsusumite ng counter affidavit si Roque sa Pilipinas ay iri-resolve ng mga prosecutors ang kaso at ibabatay ito sa nakahaing reklamo. (Gene Adsuara)

KINATAWAN ni Malabon City Administrator Dr. Alexander Rosete ang lungsod bilang paper presenter sa European Education and Leadership Summit na ginanap sa The Thames International University sa Paris, France, noong Mayo 19, kung saan ibinahagi niya ang epektibong pagpapatupad ng Malabon Ahon Blue Card (MABC) program kung paano binago ng lokal na pamahalaan ang paghahatid ng mga serbisyong panlipunan sa mga Malabueño.

Ang MABC, isa sa mga pangunahing inisyatiba ni Mayor Jeannie Sandoval na inilunsad noong Disyembre 2022, ay isang digital social welfare program na idinisenyo upang magbigay ng mahusay, napapanahon, at maginhawang access sa tulong at mahahalagang serbisyo para sa mga residente ng Malabon.

Sa kanyang presentasyon, na pinamagatang “From Policy to Progress: The Case of the Blue Card Supplemental Aid Program in Malabon City, Philippines,” ipinaliwanag ni Dr. Rosete na ang MABC ay binuo bilang bahagi ng mas malawak na pananaw ng pamahalaang lungsod upang i-streamline ang mga serbisyo at suporta sa komunidad at pagsugpo sa kahirapan—na ginagawang mas simple, mas mabilis, sentralisado, at nakatuon sa mga residente.

“We started small—with a policy that aimed to organize and centralize our social assistance programs. But what began as a simple reform quickly evolved into a citywide digital transformation platform. Today, more than 91,000 families—that’s almost the entire population of Malabon—are registered in the Blue Card system,” ani  Dr. Rosete.

Sa pamamagitan ng MABC, ang mga benepisyaryo ay nagkaroon ng access sa iba’t ibang tulong panlipunan, kabilang ang tulong pinansyal at mga grocery package. Sa taong ito, nakumpleto na ng lungsod ang 12 tranches ng pamamahagi ng tulong.

Sakop din ng programa ang Burial and Hospitalization Assistance na nagbibigay ng tig-P5,000 tulong sa mga pamilyang nangangailangan, Eskwela Savings Program para sa mga mag-aaral sa Grade 1 na makaipon ng pera para sa kanilang kinabukasan; at ang MABC Para sa Mga Kababaihan na sumusuporta sa mga solong ina sa pag-aalaga sa kanilang mga anak at pag-access sa mga oportunidad sa kabuhayan.

Ang pamahalaang lungsod ay nakipagtulungan din sa mga pribadong kumpanya at kooperatiba upang matiyak na ang mga residente ay makakakuha ng access sa mga serbisyo ng gobyerno at mga oportunidad sa ekonomiya.

omic opportunities.

“For many of our residents, the Blue Card is more than just a means to receive assistance. It is a symbol of belonging—a way to access services without having to plead, line up for hours, or explain their situation over and over again,” dagdag niya.

Sa panahon ng Summit, ginawaran rin si Dr. Rosete ng European Excellence Award bilang pagkilala sa kanyang hindi natitinag na dedikasyon, malawak na karanasan, kahanga-hangang mga nagawa, at napakahalagang kontribusyon sa pagpapabuti ng bansa at lipunan.

Ginawaran din siya ng kanyang Doctor of Philosophy Degree (Honoris Causa) sa specialized area of Public Administration and Leadership para sa kanyang makabuluhang kontribusyon sa serbisyo publiko at pamumuno na nakatulong sa pag-unlad ng mga lungsod sa Pilipinas. (Richard Mesa)

OPISYAL na inilunsad ng Navotas City Tourism Office, sa pakikipagtulungan sa Backpack Runners ang NAVORUN 2025, isang fundraising fun run na nakatakdang maganap sa Agosto 24, 2025.

Layunin ng NAVORUN na i-highlight ang Navotas hindi lamang bilang Commercial Fishing Hub ng Pilipinas, kundi bilang isang umuusbong na destinasyon sa turismo sa palakasan.

Ang event ay nag-aalok sa mga kalahok ng pagkakataong tuklasin ang kakaibang kagandahan ng lungsod, habang sinusuportahan ang isang makabuluhang layunin.

Nagpahayag naman ng buong suporta si Navotas City Mayor John Rey Tiangco sa inisyatiba.

“NAVORUN is a great way to get active, explore Navotas, and give back to the community. Whether you’re a seasoned runner or just starting out, this event is open to all,” pahayag niya.

Nag-aalok ang NAVORUN ng dalawang kategorya ng karera: 16km para sa Php 1,200 at 8km para sa Php 1,000. Lahat ng rehistradong kalahok ay makakatanggap ng race bib, finisher shirt, finisher medal, loot bag, at raffle stub.

Bukas ang pagpaparehistro hanggang Hulyo 18, 2025.

Ang kikitain sa pagtakbo ay pakikinabangan ng Navotas Drum at Bugle Corps, isang grupo ng mga mahuhusay na musikero ng kabataan na kumakatawan sa lungsod sa iba’t ibang mga kaganapan at kompetisyon.

Ang mga interesadong kalahok ay maaaring makipag-ugnayan sa Navotas City Tourism Office sa (8) 283-7415 local 116 o kaya kay Ms. Zuzy Cruz sa 0905-222-8049. Maaari din silang magmessage sa NAVOTURISMO Facebook page para sa mga update at karagdagang impormasyon. (Richard Mesa)