TINULIGSA ni Kabataan Party-list Rep. Raoul Manuel ang babala ng Duterte Youth na pagbubunyag sa umano’y korupsyon sa gobyerno na tinawag nitong “self-serving.”

Kinuwestiyon din ng mambabatas ang timing ng naturang pahayag.

“Self-serving. Kung may alam pala sila tungkol sa korapsyon, bakit di nila isiniwalat dati pa?” pagtatanong ni Manuel sa isang post nito sa X (dating Twitter).

Ang reaksyon ng mambabatas ay kaugnay sa pahayag ni Duterte Youth Party-list Chairman Ronald Gian Carlo Cardema na nagbabala sa Commission on Elections (COMELEC) na kapag hindi pinayagan ang pag-upo ng kanilang mga representante ay ibubunyag nila ang umano’y “kalokohan” na kinasasangkutan ng mga opisyal ng kongreso at comelec.

“Basta makakapit sila sa puwesto, kaya nilang isantabi ang korapsyon na pumapatay sa kinabukasan ng kabataang Pilipino. Niloloko nila kahit ang mga Duterte supporter sa pekeng mga adbokasiya nila,” ani Manuel

Iginiit pa ni Manuel na inilantad nila ang iskandalo ng confidential funds ni VP Sara, maharlika investment scam ni Marcos, at iba-iba pang anyo ng pork, nang walang hinihinging kapalit, dahil ang loyalty nila ay sa taumbayan hindi sa sinumang politiko.

“Ito ang pagiging tunay na makabayan. Ito dapat ang ipakitaa nating example sa kabataan,” pagtatapos ni Manuel. (Vina de Guzman)

UMABOT sa mahigit P270K halaga ng shabu ang nasamsam sa isang drug suspect matapos mahuling nagsusugal ng cara y cruz, kasama ang isang construction worker sa Valenzueloa City, Miyerkules ng madaling araw.

          Sa kanyang ulat kay Northern Police District (NPD) District Director P/BGen. Josefino Ligan, kinilala ni Valenzuela Police OIC Chief P/Col. Relly Arnedo ang mga naarestong suspek na sina alyas “Jeff”, 40, scrap collector at alyas “Randy”, 42, kapwa ng residente Brgy. Parada.

          Ayon kay Col. Arnedo, nakatanggap ang Paso De Blas Police Sub-Station (SS-1) ng impormasyon mula sa isang concerned citizen hinggil sa nagaganap na illegal gambling activity sa F. Santiago St,. Brgy. Parada.

          Agad inatasan ni SS1 Commander P/Capt. Michael Oxina ang kanyang mga tauhan sa pangunguna ni PSSg Fernando Laciste Jr, kasama sina PCpl John Ray Laredo at Pat Randy Oray na puntahan ang lugar kung saan huli sa akto ang mga suspek na abala sa paglalaro ng cara y cruz dakong alas-12:30 ng hating gabi.

          Nakumpiska sa mga suspek ang tatlong piso coins na gamit bilang ‘pangara’ at P750 bet money habang nakuha naman ni PCpl Laredo kay alyas Jeff ang isang sling bag na naglalaman ng walong plastic sachets ng hinihinalang shabu na may kabuuang timbang na nasa 40 grams at nagkakahalaga ng P272,000.

          Ayon kay PCpl Christopher Quiao, mahaharap ang mga suspek sa kasong paglabag sa P.D. 1602 (Anti-Illegal Gambling/Cara y Cruz) habang karagdagan na kasong paglabag sa Section 11 (Possession of Dangerous Drugs) under Art II of RA 9165 ang kakaharapin pa ni ‘Jeff’. (Richard Mesa)

SINALAKAY ng Land Transportation Office (LTO), sa ilalim ng patnubay ng Kalihim ng Department of Transportation (DOTr) Vince B. Dizon, ang isang establisyamento sa Quezon City na umano’y nagbebenta ng segunda-manong mga sasakyang may manibela sa kanan.

Ang operasyon, na sinuportahan ng mga operatiba ng Quezon City Police District (QCPD), ay nagsimula mula sa pagsubaybay sa social media patungkol sa nasabing transaksyon.

Ayon kay Asec Mendoza, ang paunang pangangalap ng impormasyon ay nagpakita na ang tindahan ay sangkot sa pagbebenta ng mga segunda-manong sasakyang may right-hand drive.

“Batay sa batas, ang mismong presensya ng mga right-hand drive na sasakyan sa bansa ay labag sa batas dahil hindi dapat sila naipapasok dito,” paliwanag ni Asec Mendoza, na binanggit ang Republic Act 8506 bilang batayan.

Batay sa RA 8506, o An Act Banning the Registration and Operation of Vehicles With Right-Hand Steering Wheel in any Private or Public Street, Road or Highway,” nakasaad na: Ipinagbabawal ang pag-import, pagpaparehistro, paggamit, o pagpapatakbo ng anumang sasakyang may manibela sa kanang bahagi sa anumang highway, lansangan, o kalsada, pribado man o pampubliko, at kabilang ang mga kalsadang pinamamahalaan ng gobyerno, lokal man o pambansa.

Ang hepe ng LTO-Intelligence and Investigation Division na si Renante Melitante ay humingi ng tulong mula sa kapulisan at noong Mayo 15, bumisita sila sa Faequip Corporation Yard na matatagpuan sa San Pedro Compound 5, Tandang Sora, Quezon City.

Sa aktwal na inspeksyon, natagpuan ng koponan ang ilang segunda-manong sasakyang may right-hand drive.

Kinumpiska ang mga dokumento ng LTO, kabilang ang mga sertipiko ng pagpaparehistro, para sa mas malalim na pagsisiyasat, kasama ang dalawang trak na may right-hand drive.

Sinabi ni Asec Mendoza na ang dalawang trak ay sasailalim sa inspeksyon upang matukoy kung ang numero ng makina at chassis ay binago.

“Inutusan ko rin ang isang masusing imbestigasyon ukol dito, partikular sa kung paano nai-rehistro ang mga imported na segunda-manong sasakyang may right-hand drive,” ani Asec Mendoza.

“Mayroon na kaming nakalap na paunang impormasyon na ang pagpaparehistro ng mga sasakyang ito ay dumaan sa isang hindi pangkaraniwang proseso at nais naming matukoy ang lahat ng taong sangkot dito,” dagdag pa niya.

“Hindi natin ito palalampasin. Tulad ng sinabi ng ating DOTr Secretary Vince Dizon, hindi papayag ang pamahalaan sa ganitong uri ng maling gawain,” ani Asec Mendoza. (PAUL JOHN REYES)

PANAHON na para pag-isahin ang lahat na “ayuda” program sa ilalim ng kasalukuyang Pantawid Pamilyang Pilipino Program (4Ps), ayon kay incoming Senator Panfilo Lacson.

Sinabi ni Lacson na ito ay bahagi ng kanyang pagsulong ng good ­governance, kasama ang mas matinding pagbusisi sa pambansang budget, sa kanyang pagbalik sa Senado.

“Ngayon pa lang, nagpapa-draft na ako sa prospective legislative staff ko ng amendment sa batas patungkol sa 4Ps. I-expand na lang yan, ma-cover ang mawalan sa trabaho, ang kulang sa kita. Huwag na ang napakaraming nomenclature kasi nakakalito at hindi saklaw ng batas, wala namang basehan. At ito parang naging political tool na lang ng mga mambabatas para gamitin sa kanilang panga­ngampanya whether panahon ng kampanya o hindi pa, ganoon ang kinalalabasan,” ani Lacson.

“Mas maganda ang 4Ps kasi ito data-driven, ito may batas, at may pinanggagalingan, may listahan na pinag-aralan. May guma-graduate, may papasok, ‘di tulad ng napaka-indiscriminate, ang TUPAD, AKAP, AICS, MAIP, katakut-takot, maraming duplication,” dagdag niya.