KULONG ang limang indibidwal, kabilang ang isang bebot matapos maaktuhang nagsusugal at makuhanan pa ng illegal na droga ang dalawa sa kanila sa magkahiwalay na operation sa Valenzuela City.

          Sa ulat ng Paso De Blas Police Sub-Station 1 kay P/Col. Relly Arnedo, OIC ng Chief ng Valenzuela police, nakatanggap sila ng tawag mula sa isang concerned citizen na may lalaro ng cara y cruz sa Francisco Compound, De Castro Subdivision, Brgy. Paso De Blas.

          Kaagad namang rumesponde ang mga pulis sa nasabing lugar kung saan naabutan nila ang dalawang lalaki na sina alyas “Danilo”, at alyas “Ryan” na naglalaro ng cara y cruz na nagresulta sa pagkakaaresto sa kanila dakong alas-8:00 ng gabi.

          Nasamsam ng mga pulis ang tatlong piso coins na gamit bilang pangara at P540 bet monet habang ang isang plastic sachet na naglalaman ng hinihinalang shabu ay nakuha kay alyas Danilo.

          Nauna rito, nadakip naman ng mga tauhan ng Ugong Police Sub-Station 8 sina alyas “Lyn”, alyas “Randy” at alyas Efren” nang maaktuhan nilang naglalaro din ng sugal na cara y cruz sa Brgy. Mapulang Lupa, bandang alas-10:45 ng gabi.

          Nakumpiska ng mga tauhan ng SS8 sa lugar ang tatlong piso coins na gamit bilang pangara at P470 bet money habang ang isang plastic sachet ng hinihinalang shabu ay nakuha kay alyas Lyn.

          Mahaharap ang mga suspek sa kasong paglabag sa PD 1602 habang karagdagan na kasong paglabag sa Comprehensive Dangerous Drug Act of 2002 ang kakaharapin pa nina ‘Danilo’ at ‘Lyn’. (Richard Mesa)

NASAWI ang 16-anyos na dalagitang estudyante at isang lolo, habang lima ang sugatan sa naganap na sunog na tumupok sa 70 kabahayan at establisimiento sa Caloocan City.

Unang nakita ang bangkay ng 62-anyos na lalaki na nagpapagaling pa lamang matapos sumailalim sa operasyon sa ulo, habang Huwebes na ng umaga nahukay ang labi ng dalagitang estudyante na na-trap din sa loob ng nasunog na tirahan sa Natividad St. Brgy. 81.

Sugatan naman ang lima pa, kabilang ang isang fire volunteer na nakuryente at dinala sila sa MCU Hospital para magamot.

Sa ulat ng Caloocan Bureau of Fire Protection, nagsimula ang sunog ng alas-4:49 ng hapon sa bahay ng isang alyas “Melanie”, negosyante ng prutas at may-ari rin ng inuupahang bahay ng nasawing lalaki.

Mabilis ang pagkalat ng apoy dahil bukod sa hindi kaagad makapasok ang mga bumbero sa napakasikip ng lugar, dikit-dikit din ang mga kabahayan na karamihan ay gawa sa light materials dahilan upang itinaas ang sunog sa ikalawang alarma.

Bandang alas-6 ng gabi nang ideklarang kontrolado na ang sunog bago tuluyang maapula ng alas-9:57 ng gabi.

Aabot sa 90 pamilya ang nawalan ng tirahan na ngayon ay pansamantalang nasa covered court ng barangay kung saan sila pinadalhan ng mga pangunahing pangangailangan ng Pamahalaang Lungsod ng Caloocan.

May hinala na naiwang naka-charge na cellphone ang sanhi ng pagsiklab ng apoy na tumupok sa tinatayang P300,000 halaga ng mga ari-arian.

Patuloy naman ang pagsisiyasat ng arson investigators matapos matuklasan na karamihan sa mga kabahayan ay gumagamit ng jumper sa kanilang kuryente. (Richard Mesa)