SA loob mismo ng presinto pinosasan ng pulisya ang 26-anyos na factory worker matapos mabistong wanted sa kasong rape sa lalawigan ng Masbate makaraang kumuha ito ng National Police Clearance sa Valenzuela City.

Ayon kay Valenzuela Police Chief P/Col. Nixon Cayaban, dakong alas-3:30 ng hapon nang magtungo ang puganteng si alyas “Tony, residente ng Gen. T. De Leon St., sa Bignay Police Sub-Station-7 upang mag-apply ng police clearance na kailangan sa kanyang trabaho bilang factory worker.

Nang isalang ang aplikasyon ni ‘Tony’, natuklsan sa e-Warrant System ng pulisya na may nakabimbin siyang warrant of arrest na inilabas ni Masbate City Regional Trial Court (RTC) Presiding Judge Ave. A. Zurbito-Alba ng Branch 48 noong Agosto 9, 2024 para sa mabigat na kasong Rape na walang inirekomendang piyansa.

Kaagad nakipag-ugnayan ang pulisya sa Masbate Police Provincial Office (PPO) at dito nila naberipika na nasa Top 3 Most Wanted Person ng Mandaon Municipal Police Station (MPS) sa Masbate si ‘Tony’ kaya isinilbi noon din sa kanya ang arrest warrant.

Pansamantalang nakapiit ang akusado sa Bignay Police Sub-Station-7 habang hinihintay pa ang ilalabas na commitment order ng hukuman para sa paglilipat sa kanya sa Masbate Provincial Jail sa Masbate City. (Richard Mesa)

TIMBOG ang dalawang babae, kabilang ang isang lola matapos salakayin ng pulisya ang garment factory na gumagawa ng mga pinekeng branded na kasuotang panloob sa Malabon City.

Dakong ala-1:00 ng hapon nang pasukin ng mga tauhan ni Northern Police District (NPD) Director P/BGen. Josefino Ligan sa bisa ng search warrant na inilabas ng Malabon Regional Trial Court (RTC) Branch 74, ang 3M Garments sa 90 P. Aquino St. Brgy. Longos na gumagawa at tumatahi ng mga pinekeng “Alfa 1 Brief”, “Amazing Panty”, at “Amazing Bra” na pawang mga branded na produkto.

Inaresto ng mga tauhan ng District Special Operation Unit (DSOU) sa pangunguna ni P/Maj. Marvin Villanueva ang 49-anyos na isa sa may-ari ng pabrika at ang 62-anyos na supervisor, habang wala naman sa naturang garments factory ang Chinese national na si Eugene Chua na may-ari rin ng 3M Garments.

Ayon sa pulisya, bulto-bultong mga pekeng branded na bra, panty, at brief na may tatak na “Personal Collections”, mga resibo at ibat-ibang dokumento ng pakikipag-transaksiyon ang nasamsam ng pulisya sa naturang pagsalakay.

Kinumpiska rin ng kapulisan ang kabuuang 32- sewing machine o makinang panahi, apat na cutting machines, at dalawang heat press machines na gamit sa paggawa ng mga pekeng produkto.

Ayon kay BGen. Ligan, mahaharap sa kasong paglabag sa R.A. 8293 o ang Intellectual Property Code of the Philippines ang naarestong suspek habang hihintayin pa ng pulisya ang ilalabas na warrant of arrest ng hukuman para tugisin si Chua. (Richard Mesa)

MAKAKABILI na ang mga residente ng Navotas ng dekalidad na bigas sa halagang P20.00 lamang kada kilo, kasunod ng paglulunsad ng P20 Rice Project ng Department of Agriculture (DA) sa lungsod.

Sa pamamagitan ng inisyatiba, ang bigas ay mabibili sa abot-kayang presyo ng mga mahihinang sektor, kabilang ang mga benepisyaryo ng Pantawid Pamilyang Pilipino Program (4Ps), senior citizens, persons with disabilities (PWDs), at solo parents. Ang bawat tao ay maaaring bumili ng hanggang 10 kilo ng bigas kada linggo.

Opisyal na inilunsad ang programa sa Kadiwa Center sa Navotas City Hall at sa Agora Market, na may paunang 75 sako mula sa DA.

Ang programa ay naglalayong sugpuin ang epekto ng pagtaas ng presyo ng pagkain at tiyakin ang food security sa mga pinaka-apektadong populasyon.

Ang P20 Rice Project ay ipinatutupad ng DA sa pamamagitan ng Food Terminal Inc. (FTI), katuwang ang mga local government units.

Nagpahayag naman ng buong suporta si Mayor John Rey Tiangco sa programa.

“We thank President Bongbong Marcos and the Department of Agriculture for making this possible. Sa halagang P20 kada kilo, makakasigurado tayong hindi lang mura kundi de-kalidad na bigas ang mabibili ang bawat Navoteño, lalo na ang nasa vulnerable sectors.” dagdag niya. (Richard Mesa)

MAARI nang makabili ang mga residente ng Navotas ng dekalidad na bigas sa halagang P20.00 lamang kada kilo, kasunod ng paglulunsad ng P20 Rice Project ng Department of Agriculture (DA) sa lungsod. Prayoridad nito ang mga 4Ps members, senior citizens, PWDs, at solo parents. Nagpahayag naman ng buong suporta si Mayor John Rey Tiangco sa programa. (Richard Mesa)