NALALAPIT na sa Mayo 12, ang eleksyon ngayong taong 2025.
At bilang kandidato sa pagka-alkalde ng Maynila, gaano na kahanda si Sam Verzosa?
Lahad niya, “Buong buhay na yata e, buong buhay ko yata ni-ready ako ni God, e. Alam mo, lahat ng nangyari sa buhay ko sa tingin ko, hinanda Niya ako para dito. Sa araw na ito, sa laban na ito, sa kakayanan ko ngayon, prinepare ako ng Panginoon.
“Sa tingin ko ito yung tadhana ko para sa mga kababayan.”
Ano so far ang realization niya tungkol sa pulitika, sa pagtakbo, sa paglapit sa mga tao?
“Mas napalapit ako sa kanila,” bulalas ni Sam, “mas napamahal ako sa kanila.
“Iba kasi pag lagi mo silang nakakasama e. “Parang pag-ibig lang e, pag lagi mo nakakasama, nagiging close kayo, napapalapit ka, nagiging close ka at ngayon, mas tumindi yung pagmamahal ko sa kanila.
“Mas lalo kong gustong ialay yung sarili ko, resources ko, lahat ng mayroon ako, actually, binibigay ko na, e.
“Kasi wala naman katapusan ang paghingi ng tulong, kakalabas mo lang dito, humihingi na naman ng panlibing, ng pang-hospital, ng pangkain. Wala ng katapusan ang hingi.
“Sabi ko, kung walang tumutulong sa kanila, ako na lang. Tutal, sobra-sobra na ho yung naging blessing sa akin e.
“Sabi ko nga, baka ito na yung tinadhana sa akin, ito talaga yung gusto ng Panginoon sa akin kasi I came from nothing.
“Walang-wala ako pero binless ako ng sobra-sobra, more than I imagined, hindi yan para solohin ko pero para i-share yan sa mga kababayan ko at ngayon may pagkakataon akong i-share ‘yan sa Maynila.
“Hindi lang ho resources ha, kasama diyan yung talinong binigay sa akin ng Diyos, tsaka yung puso kasi hindi ka naman puwedeng bigay ng bigay na hindi nag-iisip.
“So isa sa mga gagawin natin ay solusyonan yung mga problema nila. Tayo po ay isang problem solver, civil engineer ako, negosyante ako, napakadami ko ng problemang nilagpasan sa buhay, napakadami ko ng binagong buhay, marami na akong natulungan, marami na akong pina-asenso.
“Kung ano man ang ginawa ko sa buhay ko at ibang tao at mga kumpanya ko, puwede kong gawin sa Maynila para matulungan kong umasenso.
“Hindi lang yung siyudad ng Maynila, pati na po yung mga kababayan ko.”
May tsismis na ubos na raw ang pera ni Sam sa katutulong sa mga tao, wala na raw siyang pera.
“Hindi naman… nabawasan. Siyempre naman ang daming humihingi ng tulong, talagang mababawasan.
“Kaya kailangan kong kumayod, kailangan kong magnegosyo. Kaya nga kaka-re-launch lang namin e.
“Nag-launch ako ng mga bagong products at ngayon sobrang lakas ng benta, ganun yun e. “Alam mo, you think of ways paano mong masu-sustain yung ginagawa mo, e di mag-isip ka ulit, ang maganda doon, nagawa ko na dati, hindi na siya bago sa akin e.
“Alam mo, pag natikman mo ang success, madali lang i-repeat yan. You know what it takes e, discipline, focus, creativity, consistency, hard work, lahat yan normal na sa akin.
“Hindi iyan yung tipong pinakaaralan ko pa. So kung ano man ang ginawa ko dati, uulitin ko lang para mas kumita ako, mas makatulong pa ako sa mas maraming tao.”
May mga death threats ba si Sam?
“May threats tayo,” pakli ni Sam.
“Kaya minsan yung mama ko nag-aalala, lagi niyang sinasabi, ‘Mag-ingat ka, ilapit mo yung mga security mo sa iyo.’
“Pero ako naman, laking kalye naman ako. Nabuhay ako diyan, dati kami yung nagte-threat, kami yung mga bully,” at tumawa si Sam.
“Pero ngayon, hindi na natin kinatatakutan yan kasi alam natin karakas ng mga yun e, galing din tayo dun.”
Isa sa mga isinusulong ni Sam sa kanyang kampanya ay ang 3K; Kalusugan, Kaalaman at Kabuhayan.
Banggit namin kay Sam, pagkatapos ba ng eleksyon, sa Hunyo ba ay magaganap naman ang ikaapat na K at ito ay ang kasal nila ng kasintahan niyang si Rhian Ramos?
“Kasal,” ang tumatawang bulalas ni Sam, “ang ganda nun, ha!”
June bride ba si Rhian?
“Alam mo, kahit anuman ang maging resulta ng halalan na ito, ako, ito yung tadhana ko at siya na po yung pinili ko sa buhay ko. Kaya sana yan na nga ang pang-apat na K,” ang nakangiting winika pa ni Sam o SV.
(ROMMEL L. GONZALES)