2 tambay, huli sa aktong bumabatak ng droga sa Valenzuela

SHOOT sa selda ang dalawang hinihinalang drug personalities nang maaktuhan sumisinghot umano ng shabu sa Valenzuela City, Sabado ng hapon.

Sa kanyang ulat kay Northern Police District (NPD) Director P/BGen. Benliner Capili, kinilala ni Valenzuela Police Chief P/Col. Joseph Talento ang mga suspek bilang sina alyas “JE”, 41, at alyas “Kamote”, 32.

Sa ulat, nakatanggap ng impormasyon ang mga operatiba ng Valenzuela Police Station Drug Enforcement Unit (SDEU) ng impormasyon hinggil sa umano’y nagaganap na illegal drug activities sa Dulap Compound, Brgy., Pasolo.

Kaagad namang nagsagawa ng validation sa lugar ang mga operatiba ng SDEU sa pangunguna ni P/Lt. Sherwin Dascil na nagresulta sa pagkakaaresto sa mga suspek nang maaktuhan na sumisinghot umano ng shabu sa loob ng bahay ni alyas JE dakong alas-4:00 ng hapon.

Nakumpiska sa kanila ang isang nakabukas na plastic sachet na naglalaman ng hinihinalang shabu na nagkakahalaga ng P2,788 at ilang drug paraphernalias.

Ayon kay SDEU investigator P/MSg Ana Liza Antonio, kasong paglabag sa Sections 11, 12 at 15 under Article II ng R.A 9165 o ang Comprehensive Dangerous Drug Act of 2002 ang isinampa nila laban sa mga suspek sa Valenzuela City Prosecutor’s Office sa pamamagitan ng Inquest Proceedings. (Richard Mesa)