2 akusado sa Acts of Lasciviousness sa Navotas, timbog

DALAWANG lalaki na kapwa wanted kasong Acts of Lasciviousness kabilang ang 32-anyos na barangay tanod ang nalambat ng pulisya sa magkahiwalay na manhunt operation sa Navotas at Caloocan Cities.

Ikinasa ng pinagsamang mga tauhan ng Warrant and Subpoena Section, Patrol Base 3 at Women and Children Protection Desk sa ilalim ng pangangasiwa ni Navotas City Police Station Chief P/Col. Renante Pinuela ang pagtugis sa wanted na barangay tanod.

Hindi na nakapalag ang akusado nang makorner ang akusado at bitbitin ng pulisya sa bisa ng warrant of arrest na inisyu ng Family Court, Branch 9, Navotas City, alas-1:40 ng hapon sa Brgy., Sipac Almacen, Navotas City para sa kaong Acts of Lasciviousness.

Sumunod na nakorner ng mga tauhan ni Col. Pinuela ang 21-anyos na supermarket worker na residente ng Barangay NBBS Kaunlaran, sa operation sa Sangandaan, Caloocan City.

Dinakip ang akusado sa bisa ng arrest warrant na inisyu ng Family Court, National Capital Judicial Region, Branch 9, Navotas City, para din sa kasong Acts of Lasciviousness under Article 336 of the Revised Penal Code.

Pinuri naman ni Northern Police District (NPD) Acting Director P/BGen. Christopher Dela Cruz ang Navotas CPS sa kanilang pagsisikap para tugisin ang mga wanted indibidwal na bahagi aniya ng pinaigting na operation ng NPD laban sa mga ito.
(Richard Mesa)