16,000 NCRPO cops ide-deploy sa SONA ni PBBM

LABING -anim na libo (16,000) na pulis ang ide-deploy ng National Capital Region Police Office (NCRPO) para tiyakin ang seguridad at kapayapaan sa isasagawang State of the Nation Address (SONA) ni Pangulong Ferdinand “Bongbong” Marcos Jr. sa Batasang Pambansa sa Quezon City sa Lunes (Hulyo 28).

Ayon kay Major Hazel Asilo, Spokesperon ng NCRPO mula sa inisyal na 12,000 ay dinagdagan pa ang mga pulis na ginawa nang 16,000 para mangalaga sa makasaysayang okasyon.

Kabilang dito ay ang 3,707 pulis mula sa support units at 3,320 naman mula sa reinforcement units mula sa iba pang mga ahensiya ng pamahalaan na tutulong para sa pagma-maintain ng seguridad sa talumpati sa bayan ng punong ehekutibo.

“Hindi naman po overkill kaya lang mas minabuti po ng NCRPO na mas mag-prepare”, anang opisyal para ma­ging handa sa lahat ng oras. Samantalang paiiralin rin ang maximum tolerance sa pagtrato sa mga kilos protesta.

Binigyang-diin nito na may mga itinakdang lugar para magdaos ng kilos protesta, bawal ang magmartsa at lumapit sa Batasang Pambansa kung saan itinakda ang SONA sa Lunes ng hapon.

Samantala, kanselado naman ang pasok ng mga mag-aaral sa lahat ng antas sa pampubliko at pribadong eskuwelahan sa  panahon ng pagsasagawa ng State of the Nation Address SONA ni PBBM sa Lunes, Hulyo 28.

Ang suspension ng klase ay alinsunod sa Executive Order No. 10, Series of 2025 na nilagdaan at ipinalabas ni Quezon City  Mayor Joy Belmonte.

“The suspension is intended to encourage everyone to listen to the State of the Nation Address of President Ferdinand Marcos Jr. and to help the public avoid getting stuck in traffic,” ayon sa QC LGU. (Daris Jose)