16 BENEPISYARYO NABIYAYAAN NG ENTRY PASS NG NHA

NAMAHAGI ang National Housing Authority (NHA) ng mga Entry Pass (EP) para sa 16 benepisyaryo ng ahensya sa katatapos lamang na LAB FOR ALL: “Laboratoryo, Konsulta at Gamot Para sa Lahat” Caravan sa Baler Convention Center, probinsya ng Aurora, kamakailan lang.

Ayon sa direktiba ni General Manager Joeben Tai, pinangunahan nina Assistant General Manager Alvin S. Feliciano, kasama si NHA Region 3 Officer-in-Charge Ar. Ma. Fatima T. dela Cruz at Tarlac, Nueva Ecija, Aurora District Offices Manager Engr. Jerome M. Yabot ang pamamahagi ng mga EPs.

Mula sa 16 na nakatanggap, labing-isa (11) ang benepisyaryo ng Dinalungan Resettlement Project sa bayan ng Dinalungan, habang lima (5) naman ang benepisyaryo ng Nayon Kalikasan Housing Project sa bayan naman ng Casiguran.

Ang entry pass ay isang opisyal na dokumentong inisyu ng NHA sa pamamagitan ng mga regional offices nito para sa mga kwalipikadong pamilya, na nagbibigay sa kanila ng pahintulot na manirahan sa inilaang yunit ng pabahay.

Bukod dito, naglatag din ang NHA ng isang information booth na naglalayong sagutin ang mga katanungan ng publiko at magbigay ng komprehensibong detalye tungkol sa iba’t ibang programa at serbisyong pabahay ng ahensya.

Ang LAB FOR ALL, na isang inisyatiba ni First Lady Marie Louise Araneta-Marcos sa pakikipagtulungan ng iba’t ibang pampubliko at pribadong sektor, ay naglalayong maghatid ng pangunahing tulong pangkalusugan sa pamamagitan ng libreng serbisyo sa laboratoryo, medical check-up, dental checks, at pamamahagi ng libreng gamot.

Sa kanyang mensahe, binigyang-diin ng Unang Ginang na ang caravan ay sumasalamin sa pangako ng administrasyon ni Pangulong Ferdinand R. Marcos Jr. na bigyang-pansin ang health accessibility na isang susi para sa mas inklusibong pamamahala at mas pagpapabuti ng kalidad ng buhay ng buong bansa.

Samantala, nakasama rin sa aktibidad sina Public Attorney’s Office (PAO) Chief Atty. Persida Rueda-Acosta, Aurora Governor Reynante Tolentino, Rep. Rommel T. Angara, Dinalungan Mayor Biboy Vargas, at iba pang opisyal ng gobyerno.

Nakibahagi rin sa caravan ang Department of Health (DOH), Department of Trade and Industry (DTI), Department of the Interior and Local Government (DILG), Department of Social Welfare and Development (DSWD), Department of Agriculture (DA), Department of Migrant Workers (DMW), Technical Education and Skills Development Authority (TESDA), Land Transportation Office (LTO), Senate Public Assistance Office, Philippine Charity Sweepstakes Office (PCSO), Philippine Health Insurance Corp. (PhilHealth), Development Bank of the Philippines (DBP), GoNegosyo, at iba pa mula sa pribadong sektor. (PAUL JOHN REYES)