153K mag-aaral, tumanggap na ng ayuda – DSWD

TUMANGGAP  na ng educational assistance ang may 153,315 mag-aaral sa una at ikalawang Sabado ng pamamahagi ng educational assistance ng Department of Social Welfare and Development (DSWD).

Bunsod nito, may kabuuang P387.9 milyon na ang naipamahagi ng DSWD sa buong bansa para sa naturang ayuda.

Noong Agosto 28 na ikalawang Sabado ay 79,747 beneficiary nationwide ang nabigyan ng ayuda o P199.6 milyong halaga ng cash aid.

Sa naturang mga benepisyaryo, ang pinaka malaking pondo ay napunta sa 26,704 college/vocational beneficiaries na may halagang P106.6 million; P33.9 milyon naman sa 11,286 senior high school beneficiaries; P34.4 milyon sa 17,254 high school qualified applicants; at P24.5 milyon sa 24,503 elementary students.

Patuloy din ang pakiki­pag-ugnayan ng DSWD sa pamamagitan ng kanilang Field Offices (FOs) sa mga LGU partners upang matiyak ang maayos at ligtas na pamamahagi ng cash aid sa mga piling indigent students.

Una nang nakipagkasundo ang DSWD sa Department of the Interior and Local Government (DILG) upang mapangunahan ng LGUs ang paglalaan ng lugar at seguridad sa distribusyon ng ayuda.