15-ANYOS NA BINATILYO, SINAKSAK NG KAAWAY SA GANG, PATAY

NASAWI ang isang 15-anyos na binatilyo nang pagsasaksakin ng kasing edad nito at miyembro ng gang nang magpang-abot sa kalye sa Silang, Cavite kamakalawa ng gabi.

Isinugod pa sa University Medical Center, Dasmarinas City ang biktima na si Ushaine, ng Brgy Ipil 1, Silang Cavite subalit idineklarang dead on arrival dahil sa tama ng saksak sa dibdib.

Tinutugis naman ng pulisya ang suspek na si alyas Mark, 15, ng Brgy Ipil 1, Silang, Cavite na tumakas matapos ang insidente.

Sa ulat, naglalakad ang biktima at mga barkada nito bandang alas-9:30 kamakalawa ng gabi malapit sa Bulihan Slight Services Project Elementary School, Brgy Ipil 1, Silang Cavite nang bulyawan siya ng suspek na humantong sa mainitang pagtatalo.

Naglabas ng patalim ang suspek at walang sabi-sabing pinagsasaksak sa dibdib ang biktima hanggang sa tumumba ito.

Tumakas ang suspek habang ang biktima ay isinugod sa ospital subalit idineklarang dead on arrival.

Nabatid na ang biktima at suspek ay may kanya-kanyang grupo (gang) na umano’y magkaaway . (Gene Adsuara)