10 ESTUDYANTENG CAVITENYO, SASABAK SA WORLD ROBOT GAMES SA TAIWAN

SAMPUNG batang innovator mula sa Cavite ang magiging bahagi ng Philippine delegation sa World Robot Games (WRG) na gaganapin sa Taiwan mula Nobyembre 26–29, 2025. Ang international robotics competition ay lalahukan ng daan-daang delegates mula sa iba’t ibang bansa sa Asya at Europa.
Ang mga representante ay sina:Andrei Jiggerson H. Samaniego; Claude Ron R. Abriol; Fiona Nathalie J. Rosga; Bryzen R. Villanueva; Solenn Marie L. Quejado; Kylle Mathew M. Gaudiel; John Macklein DG Valdez; Kelvin Caisser Delos Reyes; Sean Andianne A. Santos (Cavite National High School – SHS) at Keisha Elhynor B. Veras (Garita Elementary School)
Nagwagi ang mga kalahok sa iba’t ibang robotics categories tulad ng ibeam, sumo auto, beam battle, robot soccer, ball fight, autonomous programming, line tracing, one-minute games, at soccer bots matapos ang serye ng lokal at rehiyonal na eliminations.
Ang delegasyon ay sasailalim sa gabay nina Coach Jellina J. Rosga, Rolan E. Briones, Justin Manuel F. Fauni, at Amy F. Frilles.
Ayon kay Teacher Coach Jellina Rosga, matagal ang naging preparasyon ng grupo at sinanay sila hindi lamang sa teknikal na robotics skills kundi pati sa teamwork, problem-solving, at real-time decision-making, na mahalaga sa international competitions.
Buong suporta naman ang ipinahayag ng mga magulang at guro, at itinuturing na malaking karangalan ang pagkakabilang ng mga estudyante sa isang prestihiyosong global event.
Sa isang pahayag, ibinahagi ni Andrei Samaniego ang inspirasyon sa likod ng kanilang pagsali:
“Ang laban naming ito ay hindi lang tungkol sa robot—ito ay laban ng puso, pangarap, at tapang. Sa bawat coding at piyesang pinaghirapan namin, dala namin ang kwento ng pag-asa at sakripisyo ng bawat kabataang Pilipino.”
Inaasa­hang magsisilbing inspirasyon ang kanilang paglahok sa mga kabataan na nahihilig sa Science, Technology, Engineering, and Mathematics (STEM), habang umaasa ang komunidad na makapag-uwi sila ng karangalan para sa Pilipinas. (Gene Adsuara)